Алс Дорнодын холбооны их сургууль Оросын зүүн хэсэгт байрладаг. Тус сургууль олон улсын оюутнуудад төрөл бүрийн түвшний 400 гаруй хөтөлбөр санал болгодог. Зарим үндсэн мэргэжлийн хөтөлбөрийг түнш их сургуулиудтайгаа хамтран зохион явуулдаг.
АДХИС 1899 онд Оросын Алс Дорнодод байгуулагдсан анхны дээд боловсролын төв болох Зүүн Хүрээлэнгээс гаралтай. Тэр үед Дорно дахины хэл (Япон, Хятад, Солонгос, Монгол) заах, захиргааны байгууллага, худалдаа, үйлдвэрлэлийн байгууллагуудад ажилтан бэлтгэх чиглэлээр мэргэшүүлж байсан. Одоо оюутнууд АДХИС-д геологичоос эхлээд эмч хүртэл төрөл бүрийн мэргэжлээр суралцах болон Англи хэлтэй хөтөлбөрүүдэд хамрагдах боломжтой. Тус их сургуульд 3,500 гадаад иргэнийг оролцуулан 24,000 оюутан сурдаг.
АДХИС хосолсон зэрэгт хөтөлбөртэй хоёр үндсэн хамтран ажилладаг сургуультай бөгөөд эхнийх нь Мэриланд мужид байрладаг Мэриландын их сургуулийн коллеж (АНУ) юм. Тус сургууль 1947 онд байгуулагдсан бөгөөд одоо АНУ-ын хамгийн шилдэг зайны боловсролын байгууллагуудын нэг гэж хүлээн зөвшөөрөгддөг. МИСК 90,000 гишүүнтэй олон улсын оюутны байгууллагатай. Тус их сургууль АДХИС-тай хамтран дэлхийн эдийн засаг/санхүү (бакалавр), дэлхийн эдийн засаг/менежментийн судалгаа (бакалавр), стратегийн менежмент (төгсөгч) гэсэн гурван хөтөлбөр санал болгодог.
Австралийн Өмнөд Квинсландын их сургууль бол АДХИС-ын хамтран ажилладаг 2 дахь сургууль юм. Тус их сургууль 1967 онд нээгдсэн бөгөөд зайны боловсрол олгох чиглэлээр мэргэшсэн. Хамтарсан хөтөлбөрийн нэр нь дэлхийн эдийн засаг/бизнесийн удирдлага (бакалавр) юм.
АДХИС мөн Оросын хэдэн шилдэг их сургуулиудтай хамтран хосолсон зэргийн хөтөлбөр хэрэгжүүлдэг. Үүнд: Москвагийн улсын олон улсын харилцааны дээд сургууль (Евразийн улс төр, эдийн засаг, Англи хэлээр), Эдийн засгийн дээд сургууль (Эдийн засаг, Орос хэлээр), Сколтех (Молекулын биотехнологи, Англи хэлээр заадаг).
Дэлхийн эдийн засаг/менежмент судлал нь бакалаврын хосолсон зэрэгт хөтөлбөрүүдийн хамгийн эрэлттэй хөтөлбөрүүдийн нэг юм. Сургалтын байр: АДХИС (1, 2-р курс) -д оюутнууд анхан шатны хичээлүүдээс суурь мэдлэг авч, цаашид сурахад шаардлагатай Англи хэлний мэдлэгээ дээшлүүлж, эдийн засгийн нэр томьёонууд сурдаг. Чадварын түвшинг TOEFL IBT, TOEFL ITP, Academic IELTS-ийн олон улсын хэлний шалгалтаар баталгаажуулдаг. Дараа нь оюутан Мэриландын их сургуулийн коллежид элсэнэ. Дараагийн хоёр жилийн хугацаанд оюутнууд АДХИС-д сурахын зэрэгцээ олон улсын багш нарын удирдсан онлайн хичээлд оролцоно.
Тэд дөрвөн жилийн хугацаанд дэлхийн эдийн засаг, олон улсын эдийн засгийн харилцаа, валютын зах зээл, санхүүгийн байгууллагууд, банк, нягтлан бодох бүртгэл, эдийн засгийн үйл ажиллагааны хяналт ба дүн шинжилгээ, статистик, олон улсын хувийн эрх зүй, маркетинг, менежмент гэх мэт чиглэлээр мэдлэгтэй болно.
Эхний 1, 2 жилийн сургалтын төлбөр: нэг жилд 210,000 рубль. 3 дахь жил: хөтөлбөрийн Оросын талын сургалтын төлбөр 147,000 рубль, Америк талын сургалтын төлбөр 6,000 ам. доллар. 4 дэх жил: хөтөлбөрийн Оросын талын сургалтын төлбөр 167,000 рубль, Америк талын сургалтын төлбөр 4,000 ам. доллар.
Цол: хоёр диплом: АДХИС-с эдийн засгийн чиглэлээр бакалаврын зэрэг, МИСК-с шинжлэх ухааны менежментийн чиглэлээр бакалаврын зэрэг. Төгсөгчийн диплом нь тухайн чиглэлээр нэмэлт шалгалт өгөхгүйгээр дэлхийн аль ч их сургуульд үргэлжлүүлэн боловсрол эзэмших боломж олгодог, АНУ-ын иргэнд өгдөг төгсөлтийн гэрчилгээтэй адил юм.
АДХИС-ын талаар дэлгэрэнгүй мэдээллийг эндээс үзнэ үү. Элсэхийн тулд хувийн бүртгэл үүсгэж, өргөдөл бөглөж, сонирхож буй хөтөлбөрөө бичиж, их сургуульд илгээнэ үү.
